اپنی کہانیاں سناتے بہار کے ’مردہ‘ آدیواسی ووٹر

’’اس کو دیکھیے! مر گیا ہے… اور چل رہا ہے۔‘‘

حالیہ دنوں میں امِت مرانڈی مذاق کا موضوع بنے ہوئے ہیں، اور آج کا دن بھی ان کے لیے الگ نہیں ہے۔ وہ اُس مچان (بانس سے بنے تختے) کی جانب بڑھ رہے ہیں، جہاں آدھا درجن گاؤں والے موجود ہیں اور ان کا مذاق اُڑا رہے ہیں۔

یہ ۳۲ سالہ سنتھال آدیواسی بھی مذاق میں شریک ہو جاتے ہیں، لیکن جلد ہی ان کا لہجہ بدل جاتا ہے۔ ’’دیکھ لِیجیے، ہم زندہ ہیں لیکن ہم کو مار دیا گیا،‘‘ یہ کہتے ہوئے ان کے چہرے کا کرب نمایاں ہو جاتا ہے۔

یومیہ اجرت پر کام کرنے والا بہار کے لوہ سنگھنا گاؤں کا یہ مزدور فوت شدہ ووٹروں کی حالیہ فہرست میں شامل اپنے نام کی طرف اشارہ کر رہا ہے۔ یہ بدنام فہرست ووٹروں کے ناموں کی خصوصی جامع نظر ثانی (ایس آئی آر) کے دوران تیار گئی تھی۔ یہ کارروائی الیکشن کمیشن نے ریاست میں انتخابی فہرستوں (الیکٹورل رول) سے نا اہل ووٹروں کو نکالنے کے لیے کی تھی۔ لیکن یہاں لوآ ٹولہ میں بہت سے اہل آدیواسی ووٹروں کو ’مردہ‘ قرار دے کر ان کے نام کاٹ دیے گئے ہیں۔ مقامی ذرائع کو میں نے فون کر کے آگاہ کیا تھا کہ امِت کا نام بھی اس فہرست میں شامل ہے۔

یہ جان کر کہ ان کا نام حذف شدہ ووٹروں کی فہرست میں شامل ہے، انہیں برا لگتا ہے۔ وہ کہتے ہیں، ’’برا تو لگتا ہے نا۔‘‘

دوپہر کے تقریباً ۱۲ بجے ہیں اور میں ایک آدیواسی بستی لوآ ٹولہ میں بوتھ نمبر ۲۲۳ کے حذف شدہ ووٹروں کی فہرست کے ساتھ موجود ہوں۔ حذف شدہ ووٹروں کی فہرست کے لیے الیکشن کمیشن کی ویب سائٹ کی بے ترتیب جانچ کے دوران میں لوہ سنگھنا گاؤں کے بوتھ نمبر ۲۲۳ تک پہنچا تھا، جہاں بہت سے آدیواسیوں کے نام کاٹ دیے گئے تھے۔

لوآ ٹولہ ایک سنتھال آدیواسی بستی ہے، جس کا نام ایک درخت سے مستعار لیا گیا ہے۔ ’دومر‘ یا گولر (کلسٹر فِگ) کے درخت کو سنتھالی میں ’لوآ‘ کہا جاتا ہے۔ سنتھالی ایک آسٹرو ایشیائی زبان ہے، جسے ہندوستان میں تقریباً ۷۴ لاکھ لوگ بولتے ہیں۔

مقامی لوگوں کا کہنا ہے کہ ان کی بستی یا ٹولہ میں ایک زمانے میں گولر کا ایک بڑا درخت ہوا کرتا تھا، جو اس سنتھالی بستی کی پہچان بن گیا۔ یہاں بڑے پیمانے پر مٹی اور پھوس کے مکانات تھے۔ سال ۲۰۲۲-۲۰۲۳ کے بہار ذات سروے کے مطابق، زیادہ تر سنتھالی لوگوں کی اوسط آمدنی تقریباً ۶۰۰۰ روپے یا اس سے کم ہے۔ پانچ میں سے ایک سنتھال آدیواسی چھوٹے یا بٹائی دار کسان کے طور پر زراعت کے پیشہ سے وابستہ ہے۔ باقی امِت کی طرح مزدوری کرتے ہیں۔ امِت پٹنہ میں بطور ڈرائیور کام کرتے ہیں۔

یہ ستمبر کا ایک گرم دن ہے، اور مانسون کے سرمئی بادل آسمان میں تیر رہے ہیں۔ لوآ ٹولہ تقریباً ویران ہے۔ زندگی کے آثار صرف اس مقام پر نظر آتے ہیں، جہاں ۱۹ سے ۵۰ سال کی عمر کے نصف درجن مرد ایک بینچ پر بیٹھے گپ شپ کر رہے ہیں۔ ان میں سے کچھ موبائل فون پر مزاحیہ ریلز دیکھنے میں مصروف ہیں۔

اپنے ہاتھ میں ووٹروں کی فہرست لیے میں نے اپنا تعارف کرایا اور انہیں وہ کاغذ دکھایا۔ میں نے انہیں بتایا کہ یہ وہ نام ہیں جن کو ووٹر لسٹ سے حذف کر دیا گیا ہے کیونکہ الیکشن کمیشن نے انہیں بطور ’مردہ‘ نشان زد کیا ہے۔

میں فوری طور پر ان کی توجہ کا مرکز بن جاتا ہوں۔ یہ دیکھنے کے لیے کہ ان کے نام اس فہرست میں ہیں یا نہیں وہ اپنے ووٹر کارڈ لانے کے لیے بھاگتے ہیں۔ ان میں سے کئی یہ دیکھ کر راحت کی سانس لیتے ہیں کہ ان کے نام اس میں شامل نہیں ہیں۔

لیکن یہاں ہر شخص اتنا ’خوش قسمت‘ نہیں ہے کہ وہ ’زندہ‘ کہلائے یا جس کا نام ہٹایا نہ گیا ہو۔

بہار میں نومبر ۲۰۲۵ میں انتخابات ہونے والے ہیں۔ اس کے دوران ۸۹ء۷ کروڑ ووٹر ۲۴۳ اسمبلی سیٹوں کا فیصلہ کریں گے۔ بھارتیہ جنتا پارٹی (بی جے پی) جو مرکز میں برسر اقتدار ہے، یہاں اچھی کارکردگی کا مظاہرہ کرنا چاہتی ہے۔ الیکشن کمیشن کی جانب سے ووٹر لسٹ پر نظر ثانی کے لیے ایس آئی آر کا جو عمل کرایا جا رہا ہے، اسے حزب اختلاف کے مطابق بی جے پی کے اشارے پر کی جانے والی کارروائی کے طور پر دیکھا جا رہا ہے۔

یکم اگست ۲۰۲۵ کو انتخابی فہرستوں کا مسودہ شائع کیا گیا اور سپریم کورٹ کی مداخلت کے بعد فہرست کو منظر عام پر لایا گیا۔ نظر ثانی میں پورے بہار میں ۶۵ لاکھ ووٹروں کے ناموں کو حذف کر دیا گیا تھا۔ ان میں سے ۳۶ لاکھ نام اس لیے حذف کر دیے گئے کیونکہ وہ یا تو مستقل طور پر ہجرت کر گئے تھے یا ان کا سراغ نہیں لگایا جا سکا؛ ۲۲ لاکھ لوگ مردہ پائے گئے، اور باقی سات لاکھ کے نام ایک سے زیادہ دفعہ درج تھے۔

چکائی اسمبلی حقلہ کے تحت آنے والا لوہ سنگھنا گاؤں بھی اس عمل سے متاثر ہوا ہے۔ یہاں ۱۶۹ نام حذف کیے گئے، جن میں سے تقریباً ۵۰ فیصد آدیواسی ہیں۔ مقامی لوگ اس بات کی تصدیق کرتے ہیں کہ فہرست میں شامل آدھے آدیواسیوں کو غلط طور پر ’مردہ‘ قرار دیا گیا ہے۔

امِت مرانڈی ایسے ہی ایک شخص ہیں۔ ان کا ووٹر فوٹو شناختی کارڈ (ایپک) نمبر اور نام حذف شدہ ووٹروں کی فہرست میں شامل تھا۔ امِت ایک سنتھال آدیواسی ہیں اور پتھر کی بجری ڈھونے والا ٹرک چلاتے ہیں۔ انہوں نے پانچویں جماعت میں اسکول چھوڑ دیا تھا۔ تقریباً چار میں سے صرف ایک سنتھال آدیواسی ہی پرائمری اسکول مکمل کر پاتا ہے، اور ایک فیصد سے بھی کم یونیورسٹی تک پہنچ پاتے ہیں۔

جب ان سے پوچھا گیا کہ ان کے خیال میں ان کا نام غلط فہرست میں کیسے شامل ہوگیا، تو ان کا کہنا تھا کہ شاید وہ گنتی (انیومریشن) فارم جمع کرانے میں ناکام رہے۔ امِت بتاتے ہیں کہ انہوں نے ہر دفعہ ووٹ دیا ہے، ’’میں نے ہر بار اپنا ووٹ ڈالا ہے۔ بھلے ہی پنچایت کے انتخابات چھوٹ گئے ہوں، لیکن میں لوک سبھا اور اسمبلی انتخابات میں اپنا ووٹ ڈالنے ضرور آتا ہوں۔‘‘

انہیں یاد ہے کہ ۲۰۲۴ کے عام انتخابات میں ووٹ ڈالنے کے لیے انہیں اپنی دو دن کی اجرت سے ہاتھ دھونا پڑا تھا۔ ’’میں پٹنہ سے ٹرین اور بس لے کر گھر پہنچا تھا۔ میں ووٹ ڈالنے کے لیے دو دن تک یہاں رہا۔ مجھے ۱۰۰۰ روپے کا نقصان اٹھانا پڑا کیونکہ مجھے کام چھوڑنا پڑا تھا،‘‘ وہ پاری کو بتاتے ہیں۔

ووٹر لسٹ سے اپنا نام حذف ہونے کی جانکاری نے انہیں پریشان کر دیا ہے۔ ’’اس کی وجہ سے مجھے مشکلات کا سامنا کرنا پڑے گا، شاید اب مجھے سرکاری اسکیموں کا فائدہ بھی نہیں ملے گا؟‘‘ وہ فکرمندی کا اظہار کرتے ہیں۔

ریاستی حکومت کے ذریعہ ۲۰۲۲-۲۰۲۳ کے ذات پر مبنی سروے کے مطابق، بہار میں ۹۹ء۲۱ لاکھ آدیواسی آباد ہیں۔ ریاست میں کسی زمانے میں آدیواسیوں کی ایک بڑی آبادی ہوا کرتی تھی، ان میں سے ایک بڑا حصہ جھارکھنڈ چلا گیا۔ جھارکھنڈ سال ۲۰۰۰ میں بہار سے الگ ہونے والی ایک نئی ریاست ہے۔ جھارکھنڈ میں، وہ کل آبادی کا ۲۶ فیصد ہیں اور انتخابی طور پر غالب ذات ہیں۔

لیکن بہار میں وہ کل آبادی کا دو فیصد سے بھی کم ہیں، اور خبروں اور ریاستی سیاست میں انہیں نظر انداز کر دیا جاتا ہے۔ بہت سے حلقوں میں بکھرے ہونے کی وجہ سے کسی بھی انتخاب میں ان کا اثر نہ ہونے کے برابر ہوتا ہے۔ اس لیے ووٹر لسٹ سے ان کا نام ہٹائے جانے پر نہ تو میڈیا نے شور مچایا اور نہ ہی سیاسی پارٹیوں نے کوئی توجہ دی۔

اس رپورٹر نے جن آدیواسی رائے دہندگان سے ملاقات کی وہ ایس آئی آر سے پوری طرح بے خبر تھے، اور انہیں یہ نہیں معلوم تھا کہ ان کا نام ووٹر لسٹ سے ہٹا دیا گیا ہے۔

چمپا مرانڈی کہتی ہیں، ’’ابھی آپ بتائے تو پتہ چلا ہے۔‘‘ لوہ سنگھنا گاؤں سے تعلق رکھنے والی اس ۳۵ سالہ آدیواسی خاتون کا کہنا ہے کہ وہ اپنے نام کے حذف ہونے سے پوری طرح لاعلم ہیں۔ میں نے انہیں دکھانے کے لیے بوتھ نمبر ۲۲۳ کا صفحہ نکالا۔ میں نے ان کے ایپک نمبر کے حذف ہونے کی تصدیق کی۔

دلچسپ بات یہ ہے کہ مسودہ کی فہرست (ڈرافٹ رول) میں ان کے شوہر سنجے مُرمو کا نام شامل ہے۔ اس صورتحال میں بھی مذاق کا پہلو نکل آتا ہے۔ ان کے پاس کھڑے ان کے ۴۰ سالہ شوہر مسکراتے ہوئے کہتے ہیں، ’’یہ کیسے ہو گیا؟ یہ تو زندہ ہی ہے۔‘‘

نظرثانی کی ذمہ داری مرد اور خواتین بوتھ لیول آفیسرز (بی ایل او) پر تھی۔ مجموعی طور پر ۷۸ ہزار اہلکاروں کو متعلقہ شناختی ثبوتوں کے ساتھ گنتی فارم تقسیم کرنے اور جمع کرنے کے کام پر لگایا گیا تھا، پھر فارم میں فراہم کردہ معلومات کی بنیاد پر فہرستوں کا مسودہ تیار کرنا تھا۔ ان کے پاس اپنے اہداف کو مکمل کرنے کے لیے صرف ایک مہینہ کا وقت تھا – یعنی ایک دن میں ۴۰ ووٹروں کی جانچ کرنی تھی۔ یہ ایک مشکل کام تھا، جو ان کے لیے تناؤ سے بھرا ہوا تھا، اور جس کے نتیجہ میں ممکنہ طور پر دوسروں کے نام کٹ سکتے تھے۔

بی ایل او سے ملاقات نہیں ہوئی اور آپ ’مردہ‘ قرار دے دیے گئے۔ اور وہ واقعی میں۔

آدیواسی سنگھرش مورچہ کے ضلع کوآرڈینیٹر باسو دیو ہانسدا کہتے ہیں، ’’چکائی میں بہت سے ایسے بوتھ ہیں جہاں سے آدیواسی ووٹروں کے ناموں کو حذف کر دیا گیا ہے۔‘‘

میڈیا سے بات کرنے کی وجہ سے کئی بی ایل او کی سرزنش کی گئی۔ اسی لیے نام نہ ظاہر کرنے کی شرط پرجموئی کے ایک آدیواسی بی ایل او نے ’پاری‘ کو بتایا کہ انہیں جنگلوں میں مقیم آدیواسیوں تک پہنچنے کے لیے کم از کم ۱۰ کلو میٹر کا فاصلہ طے کرنا پڑا تھا۔ وہ کہتے ہیں، ’’میں روزانہ ۲۰ سے ۲۵ گھروں تک پہنچتا تھا۔ اگر گھر ایک دوسرے کے قریب ہوتے تھے، تو میں ۵۰ گھروں تک بھی پہنچ جاتا تھا۔‘‘

لیکن بات صرف اتنی ہی نہیں ہے۔ تقریباً ۱۲ گھنٹے باہر کام کرنے کے بعد، ’’ہمیں فارم اور شناختی دستاویزات الیکشن کمیشن آف انڈیا (ای سی آئی) کے پورٹل پر اپ لوڈ کرنے پڑتے تھے۔ دن کے وقت انٹرنیٹ کنکشن بہت کمزور رہتا تھا، اس لیے میں انہیں رات میں اپ لوڈ کرتا تھا – بعض اوقات رات کے ۱۲ یا ۱ بجے تک۔‘‘

گھروں پر لوگوں کا نہ ملنے یا بار بار ایک ہی جگہ واپس جانے سے ان کا وقت برباد ہوتا تھا۔ وہ کہتے ہیں، ’’ہمیں [افسرانِ بالا کی طرف سے] یہ دھمکی دی گئی کہ اگر ہدف پورا نہیں ہوا تو کارروائی کی جائے گی۔ ہم نے کئی ووٹروں سے کہا کہ بس اسکول آ جائیں اور وہیں فارم بھر لیں۔‘‘ ان کا کہنا ہے کہ اگر کم از کم دو مہینے کا وقت اور واضح ہدایات ملتیں تو کام بہت آسان ہو جاتا۔

ہانسدا اس بات سے اتفاق کرتے ہیں، ’’میرا خیال ہے کہ آدیواسی بی ایل او کو بہت کم وقت دیا گیا۔ ممکن ہے وہ بہت سے آدیواسی کنبوں تک پہنچ ہی نہ سکے ہوں، اسی لیے انہیں ’مردہ‘ قرار دے دیا گیا۔‘‘ الیکشن کمیشن آف انڈیا (ای سی آئی) کے ضوابط کے مطابق، بی ایل او کو ہر ووٹر کے گھر کم از کم تین بار جانا ضروری ہے۔ لیکن جن آدیواسیوں سے میں نے بات کی، ان کا کہنا تھا کہ بی ایل او کبھی آیا ہی نہیں۔

سال ۲۰۰۵ کے بعد سے بی جے پی اور جنتا دل (یونائیٹڈ) کے اتحاد نے ریاست پر حکومت کی ہے۔ ان ۲۰ سالوں میں، جے ڈی (یو) نے دو بار قومی جمہوری محاذ (این ڈی اے) سے رشتہ توڑ کر بہار کی سب سے بڑی علاقائی پارٹی – راشٹریہ جنتا دل (آر جے ڈی) کے ساتھ مختصر مدتی اتحاد کیا ہے۔

بی جے پی، جو اب مرکز میں تین بار سے اقتدار میں ہے، کے لیے ریاست پر اپنے دم پر حکومت سازی کی کوشش بہت ضروری ہے۔ وہ حکمراں اتحاد میں رہی ہے، اور جے ڈی (یو) اس کی اتحادی ہے، لیکن وہ اب ثانوی کردار میں نہیں رہنا چاہتی ہے۔ برسراقتدار جے ڈی (یو) اپنے سربراہ اور بہار کے وزیر اعلی نتیش کمار کی گرتی صحت کے پیش نظر کمزور ہوتی جا رہی ہے۔

اسمبلی انتخابات قریب آتے ہی، الیکشن کمیشن آف انڈیا (ای سی آئی) نے ایس آئی آر کے ذریعہ ووٹروں کی فہرست پر نظر ثانی کرنی شروع کر دی۔ ’’ایس آئی آر کا مقصد یہ یقینی بنانا ہے کہ ہندوستان کے تمام اہل شہریوں کے نام ووٹر لسٹ میں شامل ہوں…‘‘ اور نااہل ووٹروں کے نام وہاں سے ہٹا دیے جائیں۔ یہ باتیں ای سی آئی کی ایک پریس ریلیز میں درج ہیں۔ اس نظر ثانی کے محرکات کے طور پر تیزی سے شہرکاری، اموات کی عدم اطلاع اور بار بار نقل مکانی کے حوالے دے گئے ہیں۔

ووٹروں کی گنتی کے فارم تقسیم کیے گئے اور بھرے ہوئے فارم جمع کیے گئے اور ای سی آئی کے پورٹل پر اپ لوڈ کیے گئے۔ یہ سلسلہ ۲۵ جون کو شروع ہوا اور ایک ماہ تک جاری رہا۔ انتخابی فہرستوں کا مسودہ یکم اگست ۲۰۲۵ کو شائع کیا گیا تھا۔

جیسے جیسے فہرستیں منظر عام پر آئیں، بہار کے مختلف علاقوں سے دعوے آنے لگے کہ بہت سے زندہ لوگوں کو مردہ قرار دے دیا گیا، گھر میں موجود لوگوں کو غائب قرار دے دیا گیا، اور یہاں تک کہ ان کے آبائی گھروں میں رہنے والوں کو بھی ’مستقل طور پر منتقل‘ قرار دے کر ان کے ناموں کو حذف کر دیا گیا۔ ووٹر لسٹ میں ناموں کی شمولیت کے لیے تقریباً ۳۶۴۷۵ انفرادی دعوے ای سی آئی کو بھیجے گئے ہیں؛ جبکہ سیاسی پارٹیوں نے ایسے ۲۵ دعوے بھیجے ہیں۔

سنگیتا سورین غصہ سے کہتی ہیں، ’’جو لوگ زندہ ہیں انہیں مردہ قرار دے دیا گیا ہے، اور جو مردہ ہیں انہیں زندہ قرار دیا گیا ہے۔‘‘

وہ لوآ ٹولہ سے بمشکل دو کلومیٹر کے فاصلہ پر واقع اپنے گھر پر ہیں۔ مکان حال ہی میں تعمیر کیا گیا ہے۔ اینٹوں کو مٹی سے جوڑا گیا ہے – یہ ایک خطرناک متبادل ہے کیونکہ مٹی بارش میں آسانی سے بہہ سکتی ہے۔ لیکن سنگیتا کے پاس ریت اور سیمنٹ استعمال کرنے کے پیسے نہیں ہیں۔ ’’میں نے ریت اور سیمنٹ کے لیے ۲۵ ہزار روپے رکھے تھے، لیکن وہ پیسے چور لے گئے۔‘‘ اس لیے ان کے پاس اینٹوں کو مٹی سے جوڑنے کے سوا کوئی چارہ کار نہیں ہے۔

فیملی کے پاس صرف دو کٹھہ (ایک ایکڑ کے دسویں حصہ سے بھی کم) زمین ہے، اس لیے ان کے شوہر منوج مرمو کو کام کے لیے باہر جانا پڑتا ہے۔ وہ کیرالہ میں کنکریٹ کے سلیب بنانے والی فیکٹری میں کام کرتے ہیں، اور ۵۰۰ روپے یومیہ کماتے ہیں۔

لوآ ٹولہ میں ۳۰ سے ۳۵ آدیواسی خاندانوں کے مرد معمول کے مطابق بنگلورو، کیرالہ، چنئی اور یہاں تک کہ دور افتادہ جموں و کشمیر کی طرف ہجرت کر رہے ہیں جہاں وہ عموماً یومیہ اجرت پر کام کرتے ہیں۔ ملک کی غریب ترین ریاستوں میں میں سے ایک، بہار سے نقل مکانی قومی اوسط سے زیادہ ہے۔

سنگیتا (۲۴) اور ان کے ۲۸ سالہ شوہر منوج ایک چھ سالہ بیٹی اور ایک چار سالہ بیٹے کے ماں باپ ہیں۔

لیکن سرکاری ریکارڈ میں اس فیملی کا وجود ہی نہیں ہے۔

میں نے انہیں ووٹر لسٹ پر نظر ثانی کی حالیہ مشق اور ووٹروں کے ناموں کو حذف کیے جانے کے بارے میں بتایا، جس میں ان کے اور ان کے شوہر کے نام بھی شامل تھے۔ وہ اپنے ووٹر کارڈ نکالتی ہیں۔ دونوں کارڈ کے ایپک نمبر حذف شدہ ناموں کی فہرست میں شامل ملتے ہیں۔ ای سی آئی کے تبصرہ میں ان کے ناموں کو کاٹنے کی وجہ ’موت‘ بتائی گئی ہے۔

سنگیتا غصہ سے کہتی ہیں، ’’مجھے نہیں معلوم کہ وہ کیسے کام کر رہے ہیں۔‘‘ وہ ۲۰۱۷ میں نئی دلہن کے طور پر اس بستی میں آئی تھیں، اور ۲۰۲۰ کے آس پاس ووٹر لسٹ میں ان کا نام شامل کیا گیا تھا۔ انہوں نے ۲۰۲۴ کے عام انتخابات میں ووٹ ڈالا تھا، ’’میں نے ایک کلومیٹر پیدل چل کر قطار میں دو گھنٹے انتظار کیا اور اپنا ووٹ ڈالا تھا۔‘‘

سنگیتا صرف اس بات سے الجھن میں مبتلا نہیں ہیں کہ انہیں اپنا اور اپنے شوہر کا نام دوبارہ ووٹر لسٹ میں شامل کرانے کے لیے بھاگ دوڑ کرنی پڑے گی، بلکہ انہیں اس بات کا بھی ڈر ہے کہ انہیں غریبوں کے لیے بنائی گئی سرکاری اسکیموں سے محروم کر دیا جائے گا۔ وہ کہتی ہیں، ’’ہم لوگوں کو کاغذ پر مار دیا تو اب سرکار سے ہم کو کچھ نہیں ملے گا۔‘‘

مردہ قرار دے دی گئیں ان کی پڑوسن، چمپا مرانڈی بھی اس خوف میں مبتلا ہیں، ’’جب ہم سرکاری اسکیموں کے لیے درخواست دیں گے، تو وہ ہمیں اسی طرح خارج کر دیں گے جیسے ہمیں مردہ قرار دیا گیا ہے۔‘‘ اس کا مطلب ہے کہ آنے والے دنوں میں انہیں سبسڈی والا راشن نہیں ملے گا اور پردھان منتری کسان ندھی کے تحت ملنے والے ۶۰۰۰ روپے کی امدادی رقم سے بھی ہاتھ دھونا پڑے گا۔

چمپا پاری کو بتاتی ہیں، ’’ہم اپنی بقا کے لیے کھیتوں کے ساتھ ساتھ تعمیراتی مقامات پر یومیہ اجرت پر کام کرتے ہیں۔ سبسڈی والا راشن اور کسان کی رقم سے ہمیں کافی مدد ملتی ہے۔‘‘

ان کے شوہر سنجے، جو کیرالہ میں کام کرتے ہیں، جولائی کے بعد سے گھر پر ہیں۔ ان کا نام ووٹر لسٹ میں برقرار ہے، لیکن انہیں عوامی تقسیم کی اسکیم (پی ڈی ایس) سے (ایک بیٹے کے نام کے ساتھ) ہٹا دیا گیا ہے۔ ’’فی الحال صرف مجھے [پی ڈی ایس سے] راشن ملتا ہے۔ مجھے نہیں معلوم کہ میرے شوہر اور بیٹے کے نام کیوں حذف کر دیے گئے۔ ہم نے اس کے بارے میں ڈیلر سے دریافت کیا تو اس نے بتایا کہ ہمیں دوبارہ درخواست دینی ہوگی،‘‘ وہ کہتی ہیں۔

جب بی ایل او چمپا مرانڈی کے پاس گیا تو ان سے غلط بیانی سے کام لیا گیا، ’’آپ کا نام لسٹ میں موجود ہے، اس لیے آپ کو کچھ کرنے کی ضرورت نہیں ہے۔ جن لوگوں کے نام فہرست میں شامل نہیں ہیں، انہیں شامل کیا جا رہا ہے۔‘‘

لیکن اب ان کا نام ہٹا دیا گیا ہے۔

امِت مرانڈی، جن کا نام حذف کر دیا گیا ہے، کہتے ہیں، ’’ایس آئی آر کے دوران کوئی بھی گنتی کا فارم لے کر نہیں آیا تھا۔‘‘ وہ پٹنہ میں کام کرتے ہیں، جو یہاں سے آدھے دن کی دوری پر۔ لیکن گزشتہ تین ماہ سے وہ لوآ ٹولہ میں مقیم ہیں۔

امِت کی پرورش ایک اکیلی ماں نے کی تھی۔ تین بھائیوں میں سب سے چھوٹے امِت پتھر کی بجری والے ٹرک چلاتے ہیں اور روزانہ ۵۰۰ روپے کماتے ہیں۔ وہ اپنی ۲۹ سالہ بیوی سنیتا ہیمبرم اور چار بچوں – جن کی عمر دو سے سات سال کے درمیان ہے – کے ساتھ پٹنہ میں کرایے کے کمرے میں رہتے ہیں۔

امت نے پاری کو بتایا، ’’میں باقاعدگی سے اپنے گاؤں آتا ہوں کیونکہ میرے پاس چھ کٹھہ [تقریباً ۰۸۳ء۰ ایکڑ] زمین ہے جس پر میں کھیتی کرتا ہوں۔ میری ماں، منی ہیمبرم گاؤں میں رہتی ہیں۔‘‘

منوج مرمو کے پاس کوئی بھی بی ایل او نہیں گیا، حالانکہ وہ بھی ایک ماہ سے گاؤں میں ہیں۔ ان کی بیوی سنگیتا کہتی ہیں کہ وہ لکڑیاں لینے باہر نکلتی ہیں، لیکن وہ ہمیشہ گھر میں ہوتے ہیں۔ ’’پچھلے ڈیڑھ مہینے میں، کوئی بھی ووٹر لسٹ اپ ڈیٹ کرنے کی جانکاری کے ساتھ نہیں آیا،‘‘ وہ مضبوطی سے کہتی ہیں۔

اور ان کا ایک مناسب سوال ہے، ’’ہم ووٹ دیتے ہیں تو سرکار کے آدمی ہی ہوئے نا! پھر کیوں کاٹا گیا ہمارا نام۔‘‘

ووٹر لسٹ سے اپنا نام حذف ہونے سے لاعلم منوج آخر کار اگست کے آخر میں کیرالہ کے لیے روانہ ہو گئے تھے۔ ’’میں نے انہیں چار دن قبل فون کر کے اس کے بارے میں بتایا تھا۔ انہوں نے مجھے بتایا کہ وہ اسے درست کرنے کے لیے واپس نہیں آئیں گے،‘‘ وہ بتاتی ہیں۔ وہ اسے درست کرنا چاہتے ہیں، لیکن سنگیتا کو معلوم نہیں ہے کہ یہ کیسےہوگا۔

’’سر، آپ ٹھیک کر دیجیے،‘‘ وہ اس رپورٹر سے درخواست کرتی ہیں۔

پس نوشت: الیکشن کمیشن نے ۳۰ ستمبر ۲۰۲۵ کو ووٹروں کی حتمی فہرست شائع کی تھی۔ نئی فہرست میں ۴۲ء۷ کروڑ ووٹر ہیں – جو پچھلی فہرست میں شامل ۸۹ء۷ کروڑ ووٹروں سے تقریباً ۴۷ لاکھ کم ہیں۔ الیکشن کمیشن کا کہنا ہے کہ خصوصی جامع نظر ثانی کے دوران ۶۶ء۶۸ لاکھ ووٹروں کو ہٹایا گیا اور ۵۳ء۲۱ لاکھ اہل ووٹروں کو شامل کیا گیا ہے۔

حتمی ووٹر لسٹ شائع ہونے کے ایک دن بعد، یکم اکتوبر ۲۰۲۵ کو اس رپورٹر نے اس اسٹوری میں شامل ان چاروں آدیواسیوں کے ایپک نمبر کی آن لائن جانچ کی تو معلوم ہوا کہ سبھی کے نام حتمی فہرست سے بھی حذف کر دیے گئے ہیں۔ اس کی وجہ سے وہ آئندہ ہونے والے بہار اسمبلی انتخابات میں ووٹ نہیں ڈال پائیں گے۔

یہ اسٹوری تکشیلا-پاری سینئر فیلوشپ ۲۰۲۵ کے تحت شائع کی گئی ہے۔