کہاں گئے تاڑ کے سبھی پتّے!

جھونوں بڑے مزے سے تاڑ کے پتّے چبا رہی ہے۔ یہ پتّے اس گھریلو بکری کے کھانے کا حصہ نہیں ہیں، لیکن چارہ کی شکل میں ان کا وقتاً فوقتاً مل جانا اس کے لیے کسی دعوت سے کم نہیں ہے۔

اس چھوٹے پالتو جانور کا یہ چارہ کلیانی پاترا کے لیے تھوڑی تشویش کی بات ہے، جنہوں نے پرانے شوق کی وجہ سے ایک ہیٹ پہن رکھا ہے۔ یہ تجربہ کار کاریگر اپنی بکری کے سر کو آہستہ سے سہلاتے ہوئے اسے اپنے تھوڑے سے بچے خام مال کو کھانے سے روکنے کی کوشش کرتی ہیں۔

شکر ہے کہ پالمیرہ تاڑ [بوراسس فلیبے لیفر] ایک لمبا درخت ہے، جس کی اونچائی ۳۰ میٹر تک ہوتی ہے۔ ’’اس تاڑ کے پتّے کو حاصل کرنے میں سب سے بڑی رکاوٹ یہ ہے کہ یہ بنگال میں پائے جانے والے سب سے اونچے درختوں میں سے ایک ہے۔ ان درختوں کی یہاں کوئی کمی نہیں ہے، لیکن ان پر چڑھنے کا ہنر اب نایاب ہو چکا ہے،‘‘ ۵۰ سالہ کلیانی بتاتی ہیں۔

ان کی پڑوسن چھایا پرمانک جو خود بھی اس ہنر میں کامل ہیں، ان کی باتوں سے اتفاق کرتے ہوئے کہتی ہیں، ’’پہلے گھر کے مرد پتّے لانے کا کام کرتے تھے، لیکن اب نوجوان لڑکے تاڑ پر چڑھنے کا ہنر نہیں جانتے ہیں۔‘‘ پھر چھایا فسلفیانہ انداز میں کہتی ہیں، ’’اب کس کے پاس درختوں پر چڑھنے کا وقت ہے؟‘‘

کلیانی اور چھایا کا تعلق اکھوڑی ڈوم برادری سے ہے، جو گزشتہ کئی نسلوں سے ان پتّوں کا کام کرتے رہے ہیں۔ ’’ہمارے آس پاس کا علاقہ تاڑ کے پتوں اور بانس کے کاموں کے لیے مشہور ہے،‘‘ کام میں مصروف کلیانی کہتی ہیں۔ ’’کچھ عرصہ قبل جب ہماری برادری میں شادی ہوتی تھی، تو بانس کے کاموں کا ہنر جاننا لڑکی اور لڑکا دونوں کے لیے ایک بڑی خوبی مانی جاتی تھی۔‘‘ وہ مزید کہتی ہیں کہ اب یہ کام بنیادی طور پر ڈوم برادری (ریاست میں جسے درج فہرست ذات کا درجہ حاصل ہے) تک ہی محدود ہو کر رہ گیا ہے۔ وہ ان پتّوں اور بانسوں کی ٹوپی، ہاتھ والے پنکھے اور دوسری چیزیں بناتی ہیں۔

باپی دھارا جیسے مرد، جو آج بھی درخت پر مشکل چڑھائی کر لیتے ہیں، ان کاریگروں کی تھوڑی بہت امید کا سبب ہیں۔ باپی ۱۰ سال کی عمر سے ان درختوں پر چڑھنے کا کام کر رہے ہیں۔ انہوں نے یہ کام اپنے کاکا (چچا) سے سیکھا ہے۔ تقریباً چالیس سال کی عمر کے باپی یہ کام پیسوں کے لیے نہیں کرتے ہیں، بلکہ اس بہانے وہ اپنی برادری کے لوگوں کی مدد کرتے ہیں۔

’’ایک چھان [رسی] جو یا تو ’تال ایر بیت‘ [تاڑ کا پتّہ]، یا پلاسٹک کی بنی ہوتی ہے، کو پیروں کے چاروں طرف باندھا جاتا ہے اور ہاتھوں کو ایک دوسرے کے ساتھ تالے کی طرح باندھ دیا جاتا ہے۔ اس طرح ہمیں اپنے آپ کو اوپر چڑھنے میں مدد ملتی ہے،‘‘ باپی بتاتے ہیں۔ ساتھ ہی وہ یہ بھی بتاتے ہیں کہ نیچے اترنا بھی اتنا ہی مشکل کام ہے۔

ایک بار جب وہ اوپر پہنچ جاتے ہیں، تب سائز اور لچک کی بنیاد پر یہ طے کرتے ہیں کہ کن پتّوں کو کاٹنا صحیح ہوگا۔ وہ ہمیں آگاہ کرتے ہیں کہ سبھی پتوں کو ایک ساتھ کاٹنا یا درخت کو نقصان پہنچانا ٹھیک نہیں ہے۔ ایک ساتھ زیادہ سے زیادہ ۲۰-۲۴ پتوں کو کاٹنا ہی صحیح ہے۔

درخت سے نیچے اترنے کے بعد، وہ پتوں کی چھنٹائی کرتے ہیں اور اس کی ڈنٹھل کو کاٹ کر نکال دیتے ہیں۔ اس کام میں تقریباً دو گھنٹے تک لگ جاتے ہیں۔

جب باپی دستیاب نہیں ہوتے ہیں، تو سندھیا مانجھی کے مطابق پتّے کو بیربھوم میں رگھوناتھ پور، کھروئی اور مجوریا کے بازاروں سے خریدا جاتا ہے۔ سندھیا بھی اسی محلہ کی ایک ماہر کاریگر ہیں جو تاڑ کے پتوں کی چیزیں بنانے میں ماہر ہیں۔ ایک ٹہنی کی قیمت تقریباً ۱۰ روپے ہوتی ہے اور ان سے دو ہیٹ بنائے جا سکتے ہیں۔

تاڑ کے مقابلے بانس زیادہ آسانی سے دستیاب ہیں۔ ’’دابلا بانس تقریباً ۱۲ فٹ لمبا ہوتا ہے اور انہیں پاس کے چوراہے سے خریدا جا سکتا ہے، جہاں پیدل پہنچنے میں مشکل سے پانچ منٹ کا وقت لگتا ہے،‘‘ کلیانی کہتی ہیں۔ انہیں بانس کی پھیری والے بیچتے ہیں جو یہاں پاس کے موئیرا پور گاؤں سے آتے ہیں۔ ایک بانس کی قیمت موسم اور مانگ کے مطابق ۶۰ روپے سے لے کر ۱۲۰ روپے کے درمیان کچھ بھی ہو سکتی ہے۔

لیکن بانس ایک سخت خام مال ہوتا ہے اور کام سے پہلے پھاڑ کر ان کے پتلے چھلکے بنانے کی ضرورت پڑتی ہے۔ کاریگر چوڑائی میں تین ملی میٹر کی پتّیاں بنا لیتے ہیں، جن کی موٹائی تقریباً آدھا ملی میٹر ہوتی ہے۔ بُنائی کا کام برادری کی عورتیں کرتی ہیں۔ کلیانی عام طور پر شام کو کام کرتی ہیں جب باہر اندھیرا ہونے لگتا ہے۔ بیر بھوم کی جان لیوا گرمی میں وہ اپنے گھر کے دروازے کے باہر بیٹھتی ہیں اور کمرے کے اندر سے چھن کر آتی ہوئی ٹیوب لائٹ کی روشنی سے ان کو مدد ملتی ہے۔ ’’اگر مال تیار ہو اور صحیح سائز میں کٹے ہوئے ہوں، تو ایک گھنٹہ میں ایک ہیٹ بنایا جا سکتا ہے۔ لیکن گھر کے دوسرے کام کاج نمٹاتے نمٹاتے ہمیں لگاتار کام کرنے کی مہلت نہیں مل پاتی ہے،‘‘ وہ کہتی ہیں۔ کلیانی، بول پور کے ایک مقامی این جی او میں بانس کی کاریگری کی ٹریننگ بھی دیتی ہیں۔

تجربہ کار کاریگر سندھیا مانجھی بتاتی ہیں کہ ہیٹ تین سائز کے بنائے جاتے ہیں: چھوٹے، اوسط اور بڑے سائز کے، جن کے لیے کاریگر بانس کے اندرونی گھیرے کی پیمائش اپنے ہاتھوں سے کرتے ہیں۔ سندھیا اپنی برادری کی بزرگ کاریگروں میں سے ایک ہیں۔ ’’یہ کام ہم نے اپنے ماں باپ سے بہت پہلے سیکھا ہے۔ ایسا لگتا ہے گویا ہم ماں کی پیٹ سے ہی اسے سیکھ کر پیدا ہوئے ہیں،‘‘ ۶۵ سال کی سندھیا ہنستے ہوئے بتاتی ہیں۔

پورے عمل کے بارے میں سمجھاتے ہوئے سندھیا پرمانک کہتی ہیں، ’’سب سے پہلے بانس کی پتلی پتّیوں والا ایک باریک اور کھلی بُناوٹ والا ہیلمیٹ جیسا ڈھانچہ تیار کر لیا جاتا ہے۔ اس کے بعد ان پر ایک کے اوپر ایک پتیوں کی پٹیاں چڑھائی جاتی ہیں، جو ایک دوسرے پر ہلکا سا چڑھی ہوتی ہیں۔ اس طرح سے بانس کا ایک کور تیار کیا جاتا ہے جسے ’چھاؤنی‘ کہتے ہیں۔ پتّوں اور قمچیوں کو اپنی جگہ ٹکانے کے لیے ان پر ایک موٹی سوئی اور دھاگے کی مدد سے سلائی کر دی جاتی ہے۔ آخر میں تاڑ کے پتے کی پتّیوں کو ہیٹ کے سب سے اوپری حصے پر سل کر اس کے کھلے ہوئے اوپری حصے کو بند کر دیا جاتا ہے۔‘‘

ہیٹ کا فریم بنانے کے لیے بانس کو چیرنے کے بعد پتلی پتّیوں میں چھیل لیا جاتا ہے۔ ’’پتّیوں کو اتنا پتلا بنایا جاتا ہے کہ وہ سر پر نہ چبھیں یا بھاری نہ لگیں۔ یہ باریکی برسوں کی مشق کے بعد ہی سیکھی جا سکتی ہے،‘‘ وہ کہتی ہیں۔

کاٹے جانے کے بعد پنکھے کے سائز کے پتّوں کو دن بھر دھوپ میں سُکھایا جاتا ہے۔ اس کے بعد انہیں استعمال میں لایا جاتا ہے۔ ایسا کرنے سے خام مال میں ایک مضبوطی آ جاتی ہے، وہ لچکدار ہو جاتے ہیں اور دھوپ یا بارش میں بھی زیادہ دنوں تک ٹکتے ہیں۔ اس کے بعد ایک چھری [چاقو] کی مدد سے ان کی پتیاں بنائی جاتی ہیں۔ ان پتیوں کو لمبائی میں ایک ہی سائز میں کاٹ لیا جاتا ہے اور اس طرح وہ استعمال کے لیے تیار ہو جاتی ہیں۔

تاڑ کے پتے پر جو موم نما پرت ہوتی ہے وہ اسے تپش مزاحم بناتی ہے، یعنی گرمی سے روکنے میں مدد کرتی ہے۔ کاریگروں نے پاری کو بتایا کہ یہی وجہ ہے کہ تاڑے کے پتّے کا بنا ہاتھ کا پنکھا بانس کے بنے پنکھے کی بنسبت زیادہ ٹھنڈا ہوتا ہے۔ جب وہ ہیٹ نہیں بناتے ہوتے ہیں، تب وہ موڑھا (اسٹول)، کرسی، کُلو (چھلنی)، چالو، جھوری (باسکیٹ یا ٹوکری)، ڈسٹ بن اور ہاتھ پنکھا جیسی بانس اور تاڑ کے پتوں کی دوسری چیزیں بنانے میں مصروف ہوتے ہیں۔

پڑوس کے محلہ شلپی پلّی کے بالکل درمیان تنگ گلیوں میں پھیلا ہوا منسا (ہندوؤں کی سانپ دیوی) کا مندر ہے۔ یہ گلیاں اتنی تنگ ہیں کہ یہاں دو بالغ افراد ایک ساتھ چل بھی نہیں سکتے ہیں، ورنہ اینٹ سے بنے گھروں کی دیواروں سے ان کے کندھے چھل سکتے ہیں۔ ’’اس محلہ کو جتنی زمین دی گئی ہے وہ کافی نہیں ہے، جب کہ خاندانوں کے سائز دن بہ دن بڑے ہوتے جا رہے ہیں۔ جگہوں کی تنگی کی بنیادی وجہ یہی ہے۔ کاریگر اپنے آس پاس کی گلیوں کا استعمال بیٹھنے اور موڑھا اور ’ٹوپی‘ بُننے کے لیے کرتے ہیں،‘‘ بول پور میونسپل کمیٹی کے رکن اوا لوہار باگڑی کہتے ہیں۔

مقامی لوگوں کے لیے یہ علاقہ ڈوم پاڑہ کے طور پر جانا جاتا ہے۔ یہ جگہ بیر بھوم میں پڑتی ہے جو مغربی بنگال کا ایک مغربی حصہ ہے۔ سال ۱۹۹۵ کے مقامی انتخابات کے دوران اس محلہ کا نام درست کر کے ’شلپی پلّی‘ (کاریگروں کا گاؤں) کر دیا گیا۔ لیکن یہاں رہنے والے لوگوں، خاص طور پر تاڑ کے پتّوں کا کام کرنے والی عورتوں کی حالت میں کوئی تبدیلی نہیں آئی ہے۔

بلکہ، بقول کلیانی، اس میں گراوٹ ہی آئی ہے۔ ’’ہماری آمدنی میں کمی آئی ہے، جب کہ چیزیں روز بروز مہنگی ہوتی جا رہی ہیں۔ ہم روزانہ اپنا پیٹ بھر پا رہے ہیں یہی بہت ہے۔‘‘ کلیانی کو یہ بھی معلوم نہیں ہے کہ اس ہنر کا مستقبل کیا ہونے والا ہے۔ ’’مانوشیر جیبونے جیروم جنم آر شیش، تائی ایٹا او…آر جوتو دن باچار آچھے باچبے [جیسے ہم پیدا ہوتے اور مر جاتے ہیں…ویسے ہی اس ہنر کے ساتھ بھی ہے، اس کو جب تک زندہ رہنا ہوگا تب تک رہے گا]،‘‘ وہ کہتی ہیں۔

اتوار کی شام کو پورا محلہ موسیقی کی آواز سے گلزار ہو اٹھتا ہے۔ ’’موسیقی، برادری کے لوگوں کو موج و مستی میں غرق کر دیتی ہے،‘‘ کلیانی کے شوہر ہیرانند پاترا اپنا ہارمونیم نکالتے ہوئے کہتے ہیں۔ دھیرے دھیرے دوسرے لوگ بھی اپنے اپنے ساز کے ساتھ شامل ہونے لگتے ہیں۔ ایک چوڑی گلی میں چٹائی بچھائی جاتی ہے اور محفل جمنے لگتی ہے۔

’’گانا بجانا ہمارا خاندانی پیشہ ہے،‘‘ ہیرانند کہتے ہیں۔ سال ۲۰۱۱ کی مردم شماری میں اس برادری کو بجنیا ڈوم کے طور پر درج کیا گیا ہے۔ ’’خاندان کے مرد شادی بیاہ اور دیگر تقریبات کے موقع پر گانا بجانا کرتے ہیں۔‘‘ وہ عموماً نوبت بجاتے ہیں، جس میں ہارمونیم، شہنائی، ڈوگی طبلہ اور پینجونی شامل ہیں۔

نوجوان نسل، برادری کے روایتی پیشہ سے دور ہونے لگی ہے۔ کلیانی کی بیٹی پوتول گھریلو ملازمہ کا کام کرتی ہیں اور ان کے شوہر سجاوٹ کا کام کرتے ہیں اور پنڈال بناتے ہیں۔ کلیانی کے بیٹے گوپی ناتھ اور پوتے سومناتھ آٹو رکشہ چلاتے ہیں۔

’’میں شاید برادری کا واحد نوجوان ہوں، جسے ہیٹ بنانا آتا ہے،‘‘ ۱۷ سال کے سومناتھ کہتے ہیں۔ ’’میں نے یہ کام اپنی دادی سے سیکھا ہے۔ جب میں چھوٹا تھا، تب اپنے سر پر سامان لے کر گھر گھر گھومتا تھا اور انہیں بیچنے میں مدد کرتا تھا۔ لیکن اب مجھے یہ کام کرنے میں شرم محسوس ہوتی ہے۔‘‘

کلیانی دس کلومیٹر کے دائرہ کے گاؤوں میں گھوم گھوم کر اپنے ذریعہ بنائے گے سامانوں کو بیچتی ہیں۔ شانتی نکیتن کے سونا جھوری کے ہفتہ وار ہاٹ (بازار) میں بھی وہ اپنا سامان بیچتی ہیں، جو ان کے محلہ سے تقریباً پانچ کلومیٹر دور ہے۔ لیکن ان کاریگروں کی شکایت ہے کہ حالیہ برسوں میں انہیں بازار میں جگہ ملنے میں مشکل پیش آ رہی ہے۔ ’’پچھلے تقریباً دس سالوں سے کچھ لوگوں کا ایک گروپ یہ طے کرنے لگا ہے کہ کسے ہاٹ میں جگہ ملے گی۔ اور ہمارے جیسے معمولی کاریگر بڑے تاجروں کے سبب تیزی سے پیچھے چھوٹتے جا رہے ہیں،‘‘ چھایا بتاتی ہیں، جو ایک بار سامان بیچنے کے لیے اپنے شوہر کے ساتھ سونا جھوری گئی تھیں۔ ضلع صنعتی کمیشن کے دفتر میں جگہ کی از سر نو تقسیم کی ان کی درخواست پر کوئی توجہ نہیں دی گئی ہے، ایسا وہ بتاتی ہیں۔

جب کاریگر براہ راست صارف کو ہیٹ بیچتے ہیں، تو عموماً اس کی قیمت ۶۰ روپے ہوتی ہے، اور بڑے سائز کے ہیٹ ۱۰۰ روپے تک میں فروخت ہوتے ہیں۔ لیکن شلپی پلّی سے تقریباً ڈیڑھ کلومیٹر دور بھوون ڈنگا کے اسٹالوں پر رک رائے جیسے دکاندار انہیں ۱۵۰ سے ۲۰۰ روپے کے درمیان بیچتے ہیں۔ ’’یہ ٹوپیاں ہم تک دلالوں کے ذریعہ پہنچتی ہیں،‘‘ رِک کہتے ہیں، ’’اس لیے وہ مہنگی فروخت ہوتی ہیں۔‘‘ کلیانی اور دوسرے کاریگر اس فرق سے اچھی طرح واقف ہیں، اور انہوں نے اس حقیقت کو کم و بیش قبول بھی کر لیا ہے۔ ’’انہیں اپنی مرضی کی قیمت پر بیچنے دیجئے،‘‘ کلیانی کہتی ہیں۔ ’’مجھے جتنے چاہیے اتنے پیسے مل جاتے ہیں۔‘‘

لیکن یہ دستکار صرف اسی کاریگری کی بدولت ہونے والی آمدنی کے بھروسے زندہ نہیں رہ سکتے ہیں، کیوں کہ سنتھیٹک اور کپڑے کی ٹوپیوں کے متبادل سے بازار بھر گیا ہے۔ ’’ٹوپی بنا کر بڑے سیزن [اپریل تا جون] میں ہماری مہینہ کی آمدنی ۴۰۰۰ روپے تک ہوتی ہے، وہیں جاڑے میں ۱۰۰۰ روپے مہینہ رہ جاتی ہے،‘‘ کلیانی بتاتی ہیں۔

لیکن جب دودھ والا، ڈاکیہ، پھیری والا اور زرعی مزدور ان کے دروازے پر صرف اس تاڑ اور بانس کی ٹوپی کے لیے آتے ہیں، تب کلیانی اور ان کی برادری کے لوگوں کو پیسے کے علاوہ ذہنی سکون بھی ملتا ہے۔ ’’ہم صرف یہی ٹوپیاں پہنتے ہیں،‘‘ ایک دودھ والا کہتا ہے، جو اپنی پرانی ٹوپی کی جگہ نئی ٹوپی خریدنے آیا ہے۔ ’’یہ سبھی موسموں کے لیے اچھا ہے۔‘‘

یہ اسٹوری مرنالنی مکھرجی فاؤنڈیشن (ایم ایم ایف) سے ملی فیلوشپ کے تحت لکھی گئی ہے۔

ترجمہ نگار: محمد قمر تبریز